《小傳日記》貓眼娛樂中期賺多一倍半!暑假票房大滿貫?

　　《小傳日記》貓眼娛樂(01896)今日出盈喜,話預計今年中期純利會介乎3.8億至4.3億人仔,比上年同期賺多1.5倍至1.83倍,而收入就會介乎約21.5億至22.5億人仔,比上年多最少八成。貓眼就話,有錢賺主要由於消費復甦令文娛行業全面復甦,尤其係「集團抓住機會大力發展業務」,所以表現成功跑贏同行。

　　貓眼身為神州數一數二嘅訂飛網,自然用到「貓眼」嘅眼光睇中唔少有機會大熱嘅電影來發行。貓眼近期都公布咗幾套自己有份出品同發行嘅一啲電影成績,其中新年檔期上映嘅《滿江紅》,係由張藝謀執導,由沈騰同易烊千璽主演嘅古裝喜劇,主要係講喺岳飛死後,關於秦檜嘅一單兇殺案嘅破案歷程。結果套戲大收45.44億人仔,成為神州最高電影票房嘅第六位。

　　而五一檔期貓眼出品嘅《人生路不熟》都突破11億銀人仔票房,成五一檔嘅全國票房冠軍。另外,貓眼暑期檔都成功扑中好多套熱門電影,包括《消失的她》、《八角籠中》、《長安三萬里》以及《封神第一部》,其中《消失的她》有香港代表文詠珊參演,仲上映緊已經去到35.15億票房,已經係最高電影票房嘅第12位,暑假都未完,應該仲有得繼續升。

　　不過睇返《滿江紅》3月都有喺香港上,上映10日都只係得142萬銀港紙票房,所以神州同香港嘅睇戲口味都差好遠呀,請請!

*編者按:本欄搜羅即日熱門傳聞,惟消息未經證實,《經濟通》亦不保證內容之準確性;本文只供參考之用,並不構成要約、招攬或邀請、誘使、任何不論種類或形式之申述或訂立任何建議

及推薦,讀者務請運用個人獨立思考能力自行作出投資決定,如因相關建議招致損失,概與《經濟通》、編者及作者無關。