《小傳日記》荷李活就快停擺!編劇演員都罷工係點解?

　　《小傳日記》AI發展一日千里,ChatGPT面世以來正式為世界打響一炮,令大家知道AI大時代已經正式來臨,ChatGPT嘅文本生成能力,衝擊一眾「揸筆搵食」工種。除此之外,AI影像、聲音生成都已經愈來愈進步。荷李活多項工種面臨危機,繼荷李活編劇工會5月2號起開始罷工,荷李活演員工會都正式喺13號晚宣布罷工。

　　荷李活演員工會今次除咗爭取片酬待遇保障之外,最重要一樣就係,要求業界確保AI生成面孔同聲音,唔可以用來取代真人演員,因為如果電影公司可以AI生成演員嘅肖像,變相之後可以不斷重用。一線演員戲份多,固然好難用AI生成全套戲,但係出鏡以秒計嘅臨時演員,好有可能會為慳成本而被用AI生成,收一次人工個樣就有可能不斷被AI生成。

　　上個月開始荷李活演員工會已經開始同製片公司同串流平台等資方談判,當時已經有超過300個大牌明星,包括梅麗史翠普同Jennifer　Lawrence等都聯署去信工會,表示支持有可能發生嘅罷工。如今正式罷工之後,所有幕前人員除咗演員之外,臨時演員、配音員、同旁白等都會罷工,而罷工唔單止係幕前演出,就連宣傳、首映甚至係頒獎禮都唔會出席。連埋一早已經罷緊工嘅編劇工會,成個荷李活近乎要停擺。

　　之前都已經講過,AI生成聲音只要經過長時間學習,聲線、腔調等都可以接近完美複製,甚至死人都可以還原把聲出來。不過如果人未死都可以不斷AI生成,對於被AI取代嘅人都係一種侮辱,同之前提過AI生成嘅版權誰屬一樣,都係道德嘅問題,請請!

*編者按:本欄搜羅即日熱門傳聞,惟消息未經證實,《經濟通》亦不保證內容之準確性;本文只供參考之用,並不構成要約、招攬或邀請、誘使、任何不論種類或形式之申述或訂立任何建議

及推薦,讀者務請運用個人獨立思考能力自行作出投資決定,如因相關建議招致損失,概與《經濟通》、編者及作者無關。