《小傳日記》銷量口水戰!小鵬被公布銷量要同理想開片?

　　《小傳日記》美國上個月通脹率終於回落到3巴仙,比起上年最高試個有成8巴仙幾,已經大幅回落,雖然美股之前炒高結果噚晚唔算升得多,不過美金回落,魚缸就多返水,結果今日就升成400幾500點。

　　魚缸今日咩板塊都升得唔錯,唯獨車股就弱咗啲,之前逆市升完一輪,到今日啲錢就走曬去追落後。相嗌唔好口,呢兩日小鵬(09868)同理想(02015)就有啲小拗撓,都唔知係咪咁小鵬同理想今日各自都要跌價收場。

　　雖然車股每個月都已經會公布上個月嘅交付量,不過理想自己更加會公布每星期嘅銷量,而且唔只係自己,仲會公布埋行家嘅銷量,不過就只係包括造車新勢力在內。最新公布7月3號至7月9號一星期銷量,理想高踞榜首賣出7900架,其次係蔚來3100架,第三就係BYD(01211)旗下騰勢,但係只賣1200架嘅小鵬就只係得第八。於是小鵬就有管理層唔忿氣,營銷總經理黃泓霖喺朋友圈就話,理想公布有關小鵬嘅銷量都係假嘅,無必要虛張聲勢,又話造車係鬥長命鬥硬淨嘅行業,最重要係踏實提供質素良好嘅產品。

　　不過有消息人士就話,其實理想都無必要刻意造假,不過計到每星期銷量就會比較波動,報來都無乜意思。有上面網民都話,如果真係造假,點解小鵬唔直接告理想,又點解唔直接自己公布數字呢?不過小鵬就未有進一步行動。

　　如今新能源車嘅競爭已經進入白熱化階段,好似理想咁已經要鬥到每星期銷量計,有人就話理想咁玩法證明新能源車已經「內捲」出一個新高度。不過又咁睇,賣花讚花香就人之常情,不過未經人哋同意就揚埋人哋條數,難免令小鵬嗰面咁火,好話唔好聽仲有排鬥,咁快傷和氣就無謂啦,請請!

*編者按:本欄搜羅即日熱門傳聞,惟消息未經證實,《經濟通》亦不保證內容之準確性;本文只供參考之用,並不構成要約、招攬或邀請、誘使、任何不論種類或形式之申述或訂立任何建議

及推薦,讀者務請運用個人獨立思考能力自行作出投資決定,如因相關建議招致損失,概與《經濟通》、編者及作者無關。