《小傳日記》外商唔想變無「鎵」「鍺」?快啲入貨無得hea!

　　《小傳日記》恒指牛熊區放養一排,噚日起啲牛仔忽然養肥,淡友今日就已經忍唔住手要滾水淥肥牛,一煲過殺盡18500以上嘅牛證重貨區,大殺差唔多成5000張對應期指張數街貨,真係夠曬和味!

　　可能係因為耶倫訪華,先有人諗住造好倉博反彈,點知就被淡友偷雞。其實晶片戰都未打完,神州限制鎵、鍺產品出口先得嗰一兩日,好難一兩日又即刻縮沙。神州今次限制出口嘅係所有

包含鎵、鍺嘅原料產品,包括金屬鎵、氮化鎵以及係鍺外延生長襯底等等,出口商要繼續出口,就要同商務部申請許可證,仲要詳細講明國外買家嘅資料,將會喺8月起生效。

　　鎵同鍺係製造半導體嘅重要原材料,其中用砷化鎵作為半導體原材料,電子移動率比起用傳統嘅矽快得多,而且可以抗干擾、低雜訊、耐高電壓、耐高溫等等,對於5G時代非常重要。

2022年,神州鎵產品同鍺產品嘅最大進口國都係日本,而神州都分別係鎵同鍺嘅最大生產國,分別佔全球產量嘅95%同67%。

　　所以當神州公布出口管制之後,好多海外晶圓製造商都快手向神州當局申請出口許可。據《路透》報道,有神州鍺產品生產商話,限制出口公布之後,已經有好多來自歐洲、日本同美國買家想要儲定貨等出口許可證,而鍺出口價格已經去到每公斤1500美金以上。

　　如今限制令已經出台,要撤回限制真係唔會咁快,唯有趁快儲定貨。不過神州係稀土最大出口國,逐隻做出口限制真係好襟計,要打晶片戰可以話仲有大把彈藥,請請!

*編者按:本欄搜羅即日熱門傳聞,惟消息未經證實,《經濟通》亦不保證內容之準確性;本文只供參考之用,並不構成要約、招攬或邀請、誘使、任何不論種類或形式之申述或訂立任何建議

及推薦,讀者務請運用個人獨立思考能力自行作出投資決定,如因相關建議招致損失,概與《經濟通》、編者及作者無關。