《小傳日記》馬斯克訪京原來為咗搞平價版Tesla?

　　《小傳日記》尋日先講完Tesla(特斯拉)創辦人兼行政總裁馬斯克飛咗去北京,仲獲國務委員兼外長秦剛接見,我哋仲一度以為佢呢次訪京同合作搞太空科技有關,據聞,佢呢次目的係為咗搞平價版特斯拉。根據消息人士和社交媒體上分享嘅照片,馬斯克仲同中國電池界巨頭、特斯拉嘅重要供應商寧德時代(深:300750)董事長曾毓群共進晚餐。

　　據業內人士分析,呢次馬斯克與曾毓群會面,商談嘅內容可能包括上海儲能超級工廠嘅儲能電芯供應、未來在北美合作建電池廠以及動力電池供應等事宜。

　　尋日仲有消息指出,馬斯克此行,係要打造平價版特斯拉,售價大約15萬人仔,講到似層層咁。特斯拉擬推出平價版車型以搶佔平價市場嘅消息,早輪已傳遍全球汽車市場,更有傳聞指出,一旦喺內地推出,新車價可望降到15萬人仔。接近特斯拉嘅消息人士指出,推出該款平價版車型嘅成本壓力頗大,如果行程允許,馬斯克將會同寧德時代高層會面洽談合作方式。

　　今年3月,有媒體報道稱,特斯拉正尋求同寧德時代喺美國合作建立一座電池工廠,而且呢個工廠將會參考寧德時代同福特嘅合作模式。目前寧德時代與福特已達成合作,由福特出資、寧德時代提供技術與服務支持的電池工廠,將於2026年投產。

　　根據美國《通貨膨脹削減法案》規定,只有車廠喺美國本土生產和組裝動力電池,先可以獲得能抵銷電池三分之一成本嘅財政補貼,消費者買電動車先可以攞到7500美元補貼。

*編者按:本欄搜羅即日熱門傳聞,惟消息未經證實,《經濟通》亦不保證內容之準確性;本文只供參考之用,並不構成要約、招攬或邀請、誘使、任何不論種類或形式之申述或訂立任何建議及推薦,讀者務請運用個人獨立思考能力自行作出投資決定,如因相關建議招致損失,概與《經濟通》、編者及作者無關。