《小傳日記》軟銀減持完輪到阿里巴巴,商湯已經炒完?

　　《小傳日記》呢排有啲公司配股或者被減持,搞到股價係咁跌。安踏(02020)宣布先舊後新折讓8.8%配股,淨籌117.3億,以償還負債同作為集團一般營運資金,今日股價裂口低開近9巴仙後維持弱勢,下午尾段仲跌緊超過7巴仙。

　　另外,早排因為AI概念而炒上嘅商湯(00020),最近不斷被減持。4月6日,軟銀減持商湯5000萬股,每股平均價2.7713銀,套現約1.39億,持股量由14.14%降至13.95%。過多無耐,阿里巴巴(09988)都減持商湯4000萬股,每股平均價3.452銀,套現1.38億,持股量由8.04%降至7.88%。同日,僱員持股公司SenseTalent　Management　Limited減持商湯507.787萬股B類股份,每股均價3.3971銀,套現1725萬,持股量由14%降至13.98%。

　　自從商湯推出AI大模型體系「日日新」,同埋旗下類ChatGPT嘅自然語言大模型應用平台「商量」,已經受到「孖屐」好大關注,股價亦因為咁而曾經炒到上3.7銀。不過,網信辦之後發意見稿,提到要有效規管AI,有關概念股即刻謝晒,龍頭股百度(09888)四月到依家跌咗超過一成二。接連有股東喺高位沽貨獲利,可能見炒到咁上下,離場穩陣啲,股價已經連跌六日。

　　睇個勢,商湯跌穿晒10同20天線,下試100天線機會好大。始終主題概念炒完,係要啲時間回下氣,跌到2.45銀先再部署喇!請請!

*編者按:本欄搜羅即日熱門傳聞,惟消息未經證實,《經濟通》亦不保證內容之準確性;本文只供參考之用,並不構成要約、招攬或邀請、誘使、任何不論種類或形式之申述或訂立任何建議

及推薦,讀者務請運用個人獨立思考能力自行作出投資決定,如因相關建議招致損失,概與《經濟通》、編者及作者無關。