menu-icon
anue logo
馬來西亞房產鉅亨號鉅亨買幣
search icon


A股港股

《小傳日記》小鵬開發新智能化架構,夠唔夠其他車企鬥?

經濟通新聞


  《小傳日記》上海車展即將舉行,小鵬汽車(09868)董事長何小鵬話,汽車行業淘汰賽啱啱開始,估計未來10年得番8間大型企業,小品牌會被併入一個大品牌之內,年銷售規模300萬架車先係車企嘅「入場券」。佢強調,成本平衡、高效研發、高端體驗會係集團未來生存之道。

  有見及此,小鵬汽車發布SPEA2.0「扶搖」全域智能化架構。據公司介紹,呢個架構開發時間經歷5年,累計研發投入超過100億元人仔,可兼容多個平台,拓展三廂轎車、兩廂車同運動轎跑、休旅車、SUV、MPV、皮卡等多類型車款。喺呢個架構下,小鵬汽車新車研發周期可縮短兩成,零件通用化率提升到八成,整車綜合研發成本降低五成,而集團研發緊10款車型。

  雖然呢個架構可能做到何小鵬所講嘅「成本平衡、高效研發、高端體驗」嘅三大生存之道,但單靠新架構,係咪代表可以幫到公司賺錢呢?要知道小鵬仲蝕緊錢,舊年發布新車款G9嘅反應一般,今年第一季交付量按年大減47%到1.8萬架,比其他新能源車企失色。

  搭載「扶搖」架構嘅第一款全新戰略車型超智駕轎跑SUV小鵬G6,聽日就會喺上海車展正式亮相。今日因為呢單消息,股價應聲炒上,曾經升超過一成三。不過,炒完呢浸之後,都要回歸現實,若果小鵬汽車仲未搵到方法解決汽車銷量低嘅問題,何小鵬口中嘅車企「入場券」唔知幾時先攞到喇!請請!


 

*編者按:本欄搜羅即日熱門傳聞,惟消息未經證實,《經濟通》亦不保證內容之準確性;本文只供參考之用,並不構成要約、招攬或邀請、誘使、任何不論種類或形式之申述或訂立任何建議

及推薦,讀者務請運用個人獨立思考能力自行作出投資決定,如因相關建議招致損失,概與《經濟通》、編者及作者無關。

文章標籤



Empty