《小傳日記》鮮花電話太輕無人送?美團貼錢騎手爭住衝!

　　《小傳日記》魚缸今日繼續尋底,今朝低開280點跌穿21000之後,跌到20800之後即刻回升,最終收市都只係跌26點,可能20800裂口底真係有支持!

　　聽日就係情人節,神州復常之後人民消費力提升,男士情人節送禮都豪返。香江就興送花去office,而上面就連iPhone都會就咁嗌人送上去。不過對於騎手嚟講,送呢類貴嘢

都好大風險,所以未必敢送。有見及此,美團(03690)就公布大物件訂單優化措施,針對鮮花、美妝、電話等等「大體積、大重量、高價格」嘅訂單分別優化配送規則,提供誘因畀騎手去接呢類情人節柯打,而方法就係美團自己出錢補貼騎手。

　　以往計錢方法,主要都以重量、體積嚟計算,所以電話呢類又貴又輕秤嘅單就無乜人接。不過美團宣布今年預計將會投入大約600萬銀人仔,用於鮮花類訂單的騎手配送費補貼。呢兩日運送呢類情人節禮物,騎手都可以獲得大訂單嘅配送補貼,例如運送「大體積」嘅花束、或者「高價格」嘅iPhone,騎手每張單嘅收入會喺基礎配送費上再加送補貼,包含履約難度補貼、高價單補貼等。有騎手就話,而家最鍾意就係送電話,因為件貨夠貴就有補貼,一樣路程就等於平時3、4張單嘅人工!

　　所以用錢解決到嘅問題就唔係問題,如果美團唔肯補貼呢類輕秤嘅情人節禮物,到時要送禮無人送就又係另一隻關公嘅出場時候,畀少少錢就解決到問題,美團都係當仁不讓!請請!

*編者按:本欄搜羅即日熱門傳聞,惟消息未經證實,《經濟通》亦不保證內容之準確性;本文只供參考之用,並不構成要約、招攬或邀請、誘使、任何不論種類或形式之申述或訂立任何建議及推薦,讀者務請運用個人獨立思考能力自行作出投資決定,如因相關建議招致損失,概與《經濟通》、編者及作者無關。