經濟通新聞
《小傳日記》手機設備股噚日收市之後,公布最新嘅出貨量數據。比較多人關注嘅舜宇(02382)舊年12月手機鏡頭出貨量按年跌40.1%至7240.1萬件,按月都跌20.5%。公司解釋,主要因為依家整體智能手機市場需求比較淡,同埋客戶年底嘅庫存管控等因素。
另一項業務車載鏡頭,出貨量按年升1.4%到491.5萬件,按月就跌33.6%,主要因為聖誕節假期嘅影響。至於手機攝像模組出貨量按年跌28.9%至3692.1萬件,按月就增長6.5%。
睇番舊年全年嘅數據,舜宇手機攝像模組同手機鏡頭的出貨量分別按年跌23%同17%,表現都幾差下。有大行覺得內地手機市場需求仍然未好轉、疫情反覆同通脹走高等因素,會繼續影響舜宇嘅手機業務。不過,該行指舊年嘅低基數,加上平均銷售價格有望上升,估計舜宇今年同出年盈利會恢復強勁增長,按年增幅估計分別有36%及44%。
舜宇有無得鹹魚翻生,手機需求都係關鍵。股價暫時仲係打橫行緊,走勢唔差但都唔係好,近排無乜特別好嘅消息出嚟,相信仲係區間上落,唔會有好大起色。仲未買嘅朋友,可以趁依家小注,博佢升番上舊年12月高位109銀左右,有近一成潛在回報。密食當三番,諗落都唔錯㗎!請請!
*編者按:本欄搜羅即日熱門傳聞,惟消息未經證實,《經濟通》亦不保證內容之準確性;本文只供參考之用,並不構成要約、招攬或邀請、誘使、任何不論種類或形式之申述或訂立任何建議
及推薦,讀者務請運用個人獨立思考能力自行作出投資決定,如因相關建議招致損失,概與《經濟通》、編者及作者無關。
上一篇
下一篇
