《小傳日記》陳國基揭露嚴酷嘅真相?真相就係笑話一場!

　　《小傳日記》魚缸噚日升完,今朝早跟住人民幣跌勢,最多跌成300幾點,不過跌跌下就即刻有承接力,好快就收復大部分失地,最終都只係跌86點,係差在個總成交都係麻麻哋。

　　今朝政務司司長辦公室就出新聞稿,澄清近排有疑似呃人廣告偷用咗陳國基張相,而呢條假報道同陳國基完全無關,叫大家小心唔好撳咗入去導致損失。之前就有財爺波叔同特首超哥中招,今次就輪到陳國基。今次同次前都一樣,一張單頭相配一句標題黨:「他揭露了嚴酷的真相。

　　個假廣告撳入去之後會係一篇假報道,話陳國基開心大發現到投資crypto嘅漏洞,而家就同大家分享4個月內大賺嘅方法,仲話唔可以畀太多人知。

　　當然小心謹慎嘅一開始就唔會撳入去睇啦,但係記得早兩年第一次見到,起初都係成龍、譚詠麟同郭富城呢啲娛樂圈名人被用嚟做呢啲廣告,譬如「郭富城失去了一切」、「郭富城家人證

實了這一消息」等等,都曾經呃到唔少網民。後尾仲大膽到用埋誠哥,再到羅致光、波叔、超哥等等嘅高官,愈用愈大膽,而且又寫到懶係有不可告人嘅秘密咁,令到信又好唔信又好都忍唔住手撳入去。

　　雖然而家撳入去都係叫人投資crypto嘅假後報道,不過巴打就話試過撳咗去了解郭富城失去咗乜嘢一切,結果部電腦就中咗毒。所以見到標題黨,第一件事都應該諗吓消息來源真唔真先,唔係一時八卦撳入去就出事喇,請請!

*編者按:本欄搜羅即日熱門傳聞,惟消息未經證實,《經濟通》亦不保證內容之準確性;本文只供參考之用,並不構成要約、招攬或邀請、誘使、任何不論種類或形式之申述或訂立任何建議

及推薦,讀者務請運用個人獨立思考能力自行作出投資決定,如因相關建議招致損失,概與《經濟通》、編者及作者無關。