《小傳日記》中環嘉仁醫療突然執笠，係咪同「微信女」有關？

　　《小傳日記》花旗國通脹終於回落，噚晚道指勁飆逾１２００點，納指爆升７個幾巴仙！全球股市齊齊爆，跌得最殘嘅魚缸今日贏開巷，今朝已經高開１０００點，食完飯返嚟上面要放大煙花，將入境檢疫放寬到「５＋３」，刺激魚缸先收復１７０００大關，繼而升超過１２００點連５０天線都過埋，升到完全唔見影！

　　不過證監同廉署查「微信女」單嘢再有料爆，開始再多啲料浮面。噚日就提到拉咗８個人，據講涉事嘅上市公司就包括皓文控股（０８０１９）同埋國茂控股（０８４２８），兩隻股今朝

都停咗牌，國茂下晝復返牌，但冇成交，另外萬成金屬（０８２９１）公告話，「一間監管機構」進入公司香港總部同主要營業地點，但係就未能發現公司香港辦事處嘅管理層。

　　據講今次主要拉咗嘅就包括懷疑「微信女」主腦，有傳就係５３歲嘅股壇玩家葉志輝（Ｓｔｅｐｈｅｎ　Ｙｉｐ），有行家仲繪形繪聲咁描述拉Ｓｔｅｐｈｅｎ　Ｙｉｐ嘅過程，疑似係調查人員上門前，已經由後門走甩去機場搭私人飛機著草，但最終都被成功攔截。

　　事有湊巧，上個星期就傳出，金利豐（０１０３１）老闆朱太旗下喺中環，原本叫金利豐中心，舊年改名做「嘉仁醫療」嘅醫療中心就突然關門大吉。當時孖屐都黑人問號，但到呢兩日就明白了。有傳疑似被捕嘅Ｓｔｅｐｈｅｎ　Ｙｉｐ同幾年前細價股風暴有關嘅曹貴子同埋朱太都份屬老友，當中同今次嘉仁執笠有無關係就不得而知。

　　不過朱太行程疑似無受影響，身為保良局屬校總校監嘅朱太近日仲出席保良局一間幼稚園嘅校慶開幕禮，似乎完全無受拘捕事件影響，請請！

＊編者按：本欄搜羅即日熱門傳聞，惟消息未經證實，《經濟通》亦不保證內容之準確性；本文只供參考之用，並不構成要約、招攬或邀請、誘使、任何不論種類或形式之申述或訂立任何建議

及推薦，讀者務請運用個人獨立思考能力自行作出投資決定，如因相關建議招致損失，概與《經濟通》、編者及作者無關。