《小傳日記》反轉豬肚就係屎,網易暴雪終於要庭上對峙!

　　《小傳日記》網易(09999)同暴雪多年感情一朝斬纜,但係剪不斷理還亂,時隔幾個月仲係糾纏不清。最新有內媒報道,網易子公司上海網之易準備將暴雪告上庭!據講網之易要求暴雪還返3億人仔「掟煲費」。

　　呢3億人仔「掟煲費」,主要係因為分手之後,暴雪唔肯揹起國服玩家嘅退款義務,拒絕向網之易支付國服退款相關費用,差唔多成億人仔。而呢3億人仔就包括:網之易已全額支付嘅《魔獸世界》等等停服遊戲嘅退款、未售遊戲商品庫存嘅預付款項同幾款未開發遊戲嘅預付保證金。

　　雖然網之易就上海出律師信,不過有律師就話,通常中資外資合作都會事先包定底,萬一有咩事可能係喺兩間公司所在地以外嘅地方進行仲裁,如果當初有傾好,係咁上海法庭就唔可以開審。

　　不過據消息人士話,暴雪對於網之易發爛渣仲未有正式嘅回應,不過有行業人士提到,兩間公司合作前傾好嘅協議都好firm,就算而家好似有爭拗,但係其實拗到嘅位都唔係咁多,只係分手後難免嘅拉拉扯扯。

　　而網易都唔係第一次發爛渣,之前暴雪曾經喺停運前一星期,同網易講數話可唔可以拖多半年先,等暴雪搵到人接手代理之後先真正分手。面對咁嘅「渣男」要求,網易直頭出公告鬧暴雪係「騎牛搵馬」、「離婚唔離身」等等,所以最後都無傾得成任何條件。其實分手之後,遊戲玩家對於呢對冤家都無咩好理,反正要棄坑嘅一早經已跳曬槽現其他game,佢哋再點嘈都係浮雲啦,請請!

*編者按:本欄搜羅即日熱門傳聞,惟消息未經證實,《經濟通》亦不保證內容之準確性;本文只供參考之用,並不構成要約、招攬或邀請、誘使、任何不論種類或形式之申述或訂立任何建議

及推薦,讀者務請運用個人獨立思考能力自行作出投資決定,如因相關建議招致損失,概與《經濟通》、編者及作者無關。